Биһиги ортобутугар мэлдьи үлэ үөһүгэр сылдьар, эргийэр-урбайар, онно оҥорор уохтарынан санаабыттарын олоххо киллэрэр күүстээх санаалаах, соһуччу толкуйдаах, айар-тутар дьоҕурдаах биирдиилээн дьон баар буолар. Олортон биир чаҕылхайдара «Аҕам сэрииттэн эргиллибит суолунан» диэн ураты айаны түстээн, эт атаҕынан 1100 км сүүрэн тиийбит: сүүрүк диэҕи — тутааччы, тутааччы диэҕи — айааччы, айааччы диэҕи — урбаанньыт Владимир Емельянов буолар. Кини бу күннэргэ алта сыллааҕыта бэйэтин уйанын-хатанын тургуппут уһун сүүрүүтүн туһунан «ИККИ АЙАН» диэн кинигэни суруйан сүрэхтээтэ, сэрии кыттыылааҕа аҕатыгар ырыа айда, бэйэтэ толкуйдаан таһаарбыт оонньуутун хаайтарыы кэмигэр онлайн ыытан оҕолору көччүттэ, ол тухары дьиэ тутар үлэтиттэн чэрдээх илиитин араарбата.
