Уус Алдан улууһугар «Норуот өйдөбүнньүгүн харыстыаххайыҥ» бырайыагынан Саабыска Кулуба олоро сылдьыбыт дьиэтин сөргүттүлэр. Уус Алдан улууһун 2-ис Байаҕантай нэһилиэгэр баар Балаҕаннаах алааһыгар Савва Егоров диэн кулуба олоро сылдьыбыт. Оччолорго кини киэҥ сиринэн тэлэһийбит Байаҕантай улууһун кулубата этэ. Норуот сөбүлээн Саабыска Кулуба диэн ааттыыр эбит. Кини 1848-1852 сылларга олоро сылдьыбыт дьиэтэ биллэ эргэрбитин Тиит-Арыы олохтоохторо көрөн, тустаах тэрилтэттэн көмө ылан, дьиэ сөргүтүлүннэ. Үрдэ сууллара кэлбит дьиэни сөргүтүүгэ икки ый устата биригээдэ хоно сытан үлэлээтэ, билигин киир да олор диэххэ айылаах гына тутта.
Дьиэ иһигэр ааспыт үйэтээҕи дьон тутта сылдьыбыт мала-сала, былыргы саха дьахтара кэппит былааччыйата баар. Онон дьиэҕэ ааспыт кэм тохтоон хаалбыкка дылы. Бу үлэ норуот түмсүүтүн биир улахан ситиһиитэ буолар.