Олунньу 11-16 күннэригэр Москва «Пионер» киинэ тыйаатырыгар сахалыы киинэлэр бэстибээллэрэ ыытыллыаҕа. Бу туһунан тэрилтэ пресс-сулууспата иһитиннэрэр.
Бырагыраамаҕа түөрт киинэ киирбит.
Бэстибээли «Окно в Европу-2020» сүрүн бирииһин ылбыт «Хара хаар» («Черный снег») киинэ арыйыаҕа. Киинэ сүрүн дьоруойа Гоша Саха сирин хотугу улуустарыгар табаар таһар. Биир сырыытыгар арыгыны эккэ атастаһар. Соҕотох айанныырга быһаарынар, ол баран иһэн массыыната алдьанар. Суола уһун — кини соҕотох.
Олунньу 12 күнүгэр «Сайсары күөлгэ» («Мой убийца») киинэ көстүөҕэ. Киинэҕэ сүппүт кыыһы көрдүүр детектив туһунан кэпсэнэр.
Олунньу 15 күнүгэр Москватааҕы норуоттар икки ардыларынааҕы киинэ бэстибээлин сүрүн бирииһин ылбыт Эдуард Новиков «Тойон кыыл» («Царь-птица») киинэтэ көстүөҕэ. «Тойон кыыл» суруйааччы Василий Яковлев «Тэҥҥэ кырдьыбыт тэҥкэ тиит» кэпсээнигэр олоҕуран уһуллубут. 1930-с сыллардаахха бүтэй тайҕаҕа олорор Микииппэр уонна Оппуос олохторо көстөр. Күһүөрү балаҕаннарын аттыгар турар тэҥкэ тииттэрин хотой буулуоҕуттан, уу-нуурал олохторо айманар.
Дмитрий Давыдов «Ийэкээм» («Нет Бога кроме меня») киинэтэ бэстибээли түмүктүөҕэ. Киинэҕэ кырдьан түөһэйэн эрэр ийэ уолун кытта алтыһыыларын туһунан кэпсэнэр.
Киинэлэр бары сахалыы тылынан нууччалыы субтитрдаах көстөллөрө бэлиэтэнэр.