Саха АССР 100 сылыгар аналлаах «Якутия. Классика. Современность» диэн кэнсиэр цикла Суорун Омоллоон аатынан опера уонна балет тыйаатырыгар олунньу 1 күнүгэр саҕаланыаҕа. Бу туһунан тыйаатыр дириэктэрэ Сергей Юнганс иһитиннэрбит.
Саҥа бырайыак чэрчитинэн саха профессиональнай музыкатын уонна өлбөт-сүппэт матыыптарын истиэххэ сөп. Саха музыката биир үйэ устата төрүттэниэҕиттэн билиҥҥэ диэри хайдах курдук күүскэ сайдыбыта көстүөҕэ. Кэнсиэр олунньу 1 күнүгэр опера уонна балет тыйаатырын онлайн-былаһааккатыгар 18.30 чаастан буолуоҕа. Манна инструментальнай, балетнай нүөмэрдэр, саха мелодистарын уонна композитордарын айымньылара көстүөхтэрэ, иһиллиэхтэрэ.