Суздаль куоракка ыытыллыбыт «Перекресток» бүтүн россиятааҕы бэстибээлгэ Чурапчы улууһун үҥкүүһүттэрэ кыайдылар. Бу туһунан Чурапчы улууһун дьаһалтатын пресс-сулууспата иһитиннэрэр.
I истиэпэннээх диплому Дириҥ сэлиэнньэтиттэн Аял Новгородов уонна Александр Собакин ыллылар.
«Куонкурус бырагыраамата икки хайысхалаах — театрализованнай көрдөрүү уонна шоу-кэнсиэр нүөмэрэ. Биһиги иккис хайысхаҕа «Күнү көрсүү» үҥкүүнэн кытынныбыт. Үҥкүү кэмигэр улахан экраҥҥа Саха сирин ураты айылҕата, ыһыах, Дьокуускай бэлиэ сирдэрэ көһүннэ», — диэтэ үҥкүү бөлөҕүн салайааччыта, хореограф Аял Новгородов.
Бэстибээлгэ Россия 10 регионуттан үҥкүү бөлөхтөрө кытыннылар. Коронавирус ыарыыта кыттааччы ахсааныгар оҕуста. Саха сирин уонна Уһук Илин регион аатыттан биир эрэ дуэт кытынна.