2021 сыл олунньутугар Саха сирин киинэ индустриятын сайыннарыы бырайыагын өрөспүүбүлүкэ бырабыыталыстыбатыгар киллэриэхтэрэ.
Концепцияны «Сахафильм» хампаанньа салайааччыта Алексей Романов көрдөрдө.
«Саха киинэтэ аан дойдутааҕы бэстибээллэргэ бириистээх миэстэлэри ылар уонна киинэ көрдөрөөччүлэр интэриэстэрин тардар. Киинэ хаачыстыбатын тупсарыы прокатчиктар өттүлэриттэн интэриэһи күүһүрдүөҕэ», — диэн кини тоһоҕолоото.
Саха сиригэр сылга ортотунан аҕыс-тоҕус киинэ тахсара бэлиэтэнэр. 2010 сылтан өрөспүүбүлүкэҕэ 95 полнометражнай уус-уран киинэ оҥоһуллубут.
Өрөспүүбүлүкэҕэ 48 киинэ саалата үлэлиир, олортон 12-тэ «Киинэ пуондата» федеральнай бырагыраама чэрчитинэн «Саха өрөспүүбүлүкэтин киинэ ситимэ» арыйан үлэлэтэр.
2020 сылга Дмитрий Давыдов «Пугало» киинэтэ бүтүн Россиятааҕы «Кинотавр» киинэ бэстибээлин сүрүн бирииһин хаһаайына буолбута.
2019 сыллаахха Любовь Борисова «Мин үрдүбэр күн хаһан да киирбэт» киинэтэ 41-с Москватааҕы норуоттар икки ардыларынааҕы киинэ бэстибээлин көрөөччү биһирэбилэ бирииһин уонна XXII-с Шанхайдааҕы норуоттар икки ардыларынааҕы киинэ бэстибээлин бирииһин ылбыта, ону тэҥэ аан дойдутааҕы прокатка тахсыбыта.
Соторутааҕыта режиссер Степан Бурнашев «Хара Хаар» киинэтэ «Европаҕа түннүк-2020» киинэ бэстибээлин сүрүн бирииһин ылбыта.