Өймөкөөн улууһугар Олоҥхо ыһыаҕа от ыйын 1-2 күннэригэр Томтор сэлиэнньэтигэр «Көмүс күрүө» этнокомплекска ыытыллыаҕа.
«Бу күннэргэ өрөспүүбүлүкэ араас муннугуттан делегациялар кэлэллэр, биһиги волонтердарбыт кинилэри көрсөллөр. Култуура волонтердара — Саха сирин култуураҕа идэтийбит үлэһиттэр. Ону тэҥэ ХИФУ волонтердара бааллар. Кинилэр көхтөөхтүк көмөлөһөллөр. Билигин делегациялар оскуолаҕа уонна балааккаларга түһэллэр. Бары усулуобуйа тэриллибитэ. Биһиги волонтердарбыт солбуллубат көмөлөһөөччүлэр, кинилэргэ махталбын тиэрдиэм этэ», — диэн СӨ волонтердарын координатора Майя Амбросьева иһитиннэрдэ.
Билиҥҥи туругунан 19 улуус бэрэстэбиитэллэрэ кэлбиттэр, өссө биэс муниципалитет кэлэрэ күүтүллэр.
Майя Амбросьева бэлиэтээбитинэн, Олоҥхо ыһыаҕын кыттааччыларыгар анаан оскуолаҕа итии ас бэлэмнээбиттэр. Тэрийээччилэргэ 39 култуура волонтера уонна Өймөкөөнтөн сылдьар ХИФУ 45 волонтера көмөлөһөр. Ыалдьыттары биэс эбийиэктэринэн түһэртиэхтэрэ.