Сэтинньи 23-24 күннэригэр Дьокуускайга ыытыллар «Цифровой Алмаас» форумҥа Россия биллэр стриминговай платформаларын бэрэстэбиитэллэрэ кыттыыны ылыахтара. Тэрээһин сахалыы киинэ дойду биллэр киинэ сервистэригэр тарҕанарыгар көмөлөһүөхтээҕин СӨ Сайдыытын Корпорациятын генеральнай дириэктэрэ Афанасий Саввин иһитиннэрбит.
Кини этэринэн тэрээһиҥҥэ Окко, Wink бэрэстэбиитэллэрэ кытталлара былааннанар.
«Саха сирэ Россия атын регионнарыттан, Москваны уонна Санкт Петербуру аахпакка, элбэх киинэни оҥорон таһаарар. «Цифровой Алмаас» форумҥа ханнык саҥа бырайыак билигин үлэлиирин, режиссердар уонна продюсердар санааларын билиэххэ сөп буолуоҕа», — диэн Афанасий Саввин бэлиэтээбит.
Федеральнай форум Дьокуускайга иккис төгүлүн «Үлэ кыбаарталын» былаһааккатыгар ыытыллыаҕа. 2,5 тыһыынчаттан тахса кыттааччы дойдуга ИТ-индустрия сайдыытыгар өйөбүл саҥа дьаһалларын дьүүллэһиэхтэрэ. Форуму Россияҕа Сибээс, маассабай коммуникация уонна цифровой сайдыы министиэристибэтэ уонна Саха сирин бырабыыталыстыбата тэрийэн ыытар.
Санатан эттэххэ, кэлэр уон сыл иһигэр цифровой сайдыыга уларытыыны киллэрии туһунан Россия бэрэсидьиэнэ Владимир Путин этии киллэрбитэ.