Быйыл Казахстаҥҥа муус устар иккис аҥаарыттан Саха сирин экономикатын, атыытын-эргиэнин, инвестициятын, култууратын уонна туризмын сайдыытын көрдөрүөхтэрэ.
Санатарбыт курдук, Ил Дархан Айсен Николаев Казахстан бэрэсидьиэнин Касым-Жомарт Токаевтыын 2023 сыл тохсунньутугар Астанааҕа көрсүбүтэ. Көрсүһүү кэмигэр өрөспүүбүлүкэлэр икки ардыларыгар ыытыллыахтаах үлэ сыалын-соругун, хайысхатын дьүүллэспиттэрэ, ону тэҥэ Казахстаҥҥа Саха сирин күннэрин тэрийэри былааннаабыттара.
Бу күннэр чэрчилэринэн сахалыы киинэлэри көрдөрүөхтэрэ, Олоҥхо тыйаатырын испиктээктэрин туруоруохтара, «Виртуозы Якутии» ансаамбыл кэнсиэрин оҥоруохтара.
Астанааҕа «Сделано в Якутии» хампаанньа оҥорор бородууксуйатын дьон биһирэбилигэр таһаарыахтара.
Казахстан Национальнай түмэлигэр «Сокровища Якутии» норуодунай прикладной искуустуба уонна култуура быыстапкатын тэрийиэхтэрэ.
Спорт бырагырааматыгар мас тардыһыыга Казахстан чөмпүйэнээтин уонна семинарын ыытыахтара, ону тэҥэ Саха сирин уонна Казахстан хамаандалара көҥүл тустууга уонна мас тардыһыыга күрэхтэһиэхтэрэ.
Петропавловскайга М.К.Аммосов аатынан «Пламенный Максим» диэн быыстапка тэрийиэхтэрэ.
Казахстан Хоту уобалаһын акиматын уонна СӨ бырабыыталыстыбатын икки ардыларынааҕы меморандума олоххо киирэригэр аналлаах тэрээһиннэр былааннара баттанара көрүллэр.
Алматыыга төрүт тыл литэрэтиирэтин сайдыытыгар аналлаах боппуруостары ырытар норуоттар икки ардыларынааҕы төгүрүк остуолун ыытыахтара, Казахстан, Кыргызстан, Саха сирин норуоттарын эпостарын толорооччулар көрүсүһүүлэрин тэрийиэхтэрэ.
Источник фото: top-fon.com