Олоҥхо күнүн көрсө үөрүүлээх декада арыллыыта алгыс сиэрин-туомун толоруунан саҕаланна. Саалаҕа мустубут ыалдьыттар, көрөөччүлэр ыраастанан алгыстаннылар. Ол кэннэ сыанаҕа оҕо-аймах быыһыгар уол, ыччат, аҕам саастаах эр дьон оллоонноон олорон олоҥхолуулларын иһиттибит.
Нам улууһун олоҥхоһуттарын туһунан уһуллубут сюжет көһүннэ. Онтон улуустааҕы олоҥхо күрэҕин 5 төгүллээх кыайыылааҕа, ыччат муҥха олоҥхотун муҥутуур кыайыылааҕа, «Ай-Тыл», «Дьэргэлгэн», «Чугдаарар чуорааннар» фольклор бөлөхтөрүн салайааччыта Вера Цыпандина аныгылыы олоҥхону толорбутун мустубут дьон сөҕө-махтайа иһиттэ-көрдө.
Ол кэннэ үрдүк сыанаҕа ытыс дохсун тыаһынан улууспутугар олоҥхону толорооччулар таҕыстылар. Уопсайа улууска 23 эдэриттэн эмэнигэр тиийэ олоҥхону толорооччу, тарҕатааччы баар. Кинилэр улууспут аатын республикаҕа куруутун ааттаталлар. Олоҥхону киэҥник тарҕатыыга кылааттарын киллэрэллэр. Саха тылбытын, культурабытын, духуобунай баайбытын илдьэ сылдьар дьоммутугар өйдөбүнньүк бэлиэлэри туттардылар.
Улуустааҕы культура уонна духуобунай сайдыы управлениетын салайааччы Семен Ядрихинский, улуустааҕы үөрэх управлениетын салайааччы Мария Игнатьева, социология билимин доктора, СР наукатын үтүөлээх деятелэ, «Эҥсиэли хочотун культурнай ситимэ (тутула)» Намнааҕы айар бөлөҕүн салайааччыта Ульяна Винокурова, И.Е. Винокуров аатынан Хатыҥ Арыытааҕы историяны уонна кыраайы үөрэтэр музей директора Афанасий Христофоров, улуус баһылыгын солбуйааччы, улуустааҕы Олоҥхо ассоциациятын саҥа талыллыбыт председателэ Егор Протопопов уонна улуустааҕы Олоҥхо ассоциациятын сүрүннүүр секретара Светлана Лукина декада арыллыбытын эҕэрдэлэрин эттилэр.
Бу күн улуус, республика культуратын уонна искусствотын сайдыытыгар кылаатын иһин П.П. Ядрихинскай – Бэдьээлэ аатынан Олоҥхо дьиэтин үҥкүү коллективтарын балетмейстера Римма Татаринова «СР культуратын туйгуна» бэлиэни тутта. Ону сэргэ Нам улууһун культуратын сайдыытыгар кылаатын, Олоҥхо декадатын чэрчитинэн олоҥхоһут, СР культуратын туйгуна Елена Маркова «Нам улууһун культуратын сайдыытыгар кылаатын иһин» бочуоттаах бэлиэнэн наҕараадаланна. Улуустааҕы олоҥхо күрэҕин 5 төгүллээх кыайыылааҕа, ыччат муҥха олоҥхотун муҥутуур кыайыылааҕа, «Ай-Тыл», «Дьэргэлгэн», «Чугдаарар чуорааннар» фольклор бөлөхтөрүн салайааччыта Вера Цыпандина улуустааҕы культура уонна духуобунай сайдыы управлениетын Махтал суругунан наҕараадаланна.
Күндү ыалдьыппыт Ульяна Алексеевна олус өрө көтөҕүллэн туран, республика үрдүнэн Нам улууһа бастакынан декаданы саҕалаата диэн тыл эттэ. Куораттан чугас олорон хайдах курдук төрүт тылбытын харыстаан, ытыктаан илдьэ сылдьарбытын, сүүнэ улахан уораҕайга улууспут дьоно-сэргэтэ духуобунас өттүнэн сайдалларын, байалларын тоһоҕолоон эттэ. Ульяна Винокурова улууспут культурабыт кодун оҥорууга үлэлэһиэхтээх. Онон мантан инньэ элбэхтик көрсөн-билсэн иһиэхпит диэн эттэ.
Үөрүүлээх арыллыы кэнниттэн улууспут киэн туттар ансаамбыллара, фольклорнай бөлөхтөрө эҕэрдэ кэнсиэр көрдөрдүлэр.
Бу курдук, киһи-аймах чулуу айымньыта буолбут олоҥхо декадатын арыллыы үрдүк таһымҥа ааста.
Источник: https://t.me/namskiyulus/47286