Арктикатааҕы култуура уонна искусство судаарыстыбаннай институтун норуодунай уус-уран култуура кафедратын уһуйааччылара уонна устудьуоннара «Алгыстаах салама» диэн сахалыы адвент-халандаар бырайыагын олоххо киллэрэллэр.
Бу бырайыагы «Теория и история народной художественной культуры» диэн дьиссипилиинэҕэ толкуйдаабыттар. Бырайыак ааптардарыттан биирдэстэрэ үһүс куурус устудьуона Юлианна Захарова.
«Бу идиэйэни биһиги саҥа дьыллааҕы адвент-халандаарга сирдэтэн толкуйдаабыппыт. Зоя Андреевна пааратын кэмигэр ыччакка төрөөбүт култууратын интэриэһиргэтэр гына ханнык ньыма ордук табыгастааҕын көрбүтүм. Биһиги халандаарбыт уратыта диэн хас күн аайы кыра сорудахтары толорон, өбүгэлэрбит үтүө үгэстэрин кытта билсэбит», – диэтэ утудьуон.
Норуодунай уус-уран култуура кафедратын сэбиэдиссэйэ, бырайыак ааптара Зоя Стрекаловская кэпсээбитинэн, адвент-халандаары оҥорорго кафедра устудьуоннара, уһуйааччылара бары үлэлэһэллэр. Саха төрүт култууратыгар «алгыстаах салама» киэҥ суолталааҕын кини бэлиэтээтэ. Сылгы сиэлиттэн хатыллыбыт салама киһини амарах, эйэҕэс оҥорор, бары куһаҕантан сэрэтэр, араҥаччылыыр.
«Халандаары биһиги Ньукуолун күнүгэр анаан оҥордубут. Ньукуолун сахаларга сайын кэлбитин бэлиэтиир күн буолар. Ол иһин адвент-халандаар саха дьонугар Ньукуолун күн суолтатын быһаарар», – диэн Зоя Стрекаловская кэпсээтэ.
Адвент-халандаар муус устар 22 күнүттэн ыам ыйын 22 күнүгэр диэри суоттаммыт. Маны барытын АГИКИ уһуйааччылара уонна устудьуоннара бэйэлэрэ оҥорбуттар.Саламаҕа кумааҕынан ыаҕайа оҥорон ыйаабыттар, онно сахалыы алгыстары, ырыссаптары, QR-код нөҥүө араас видеоуруоктары, лекциялары буолуохха сөп.
«Биһиги бу бырайыакпытынан патент ыларга сайаапка биэрдибит. Биир халандаары оҥорон баран үлэбитин тохтоппоппут. Саха национальнай бырааһынньыгар Ыһыахха халандаар оҥорор былаан баар», – диэн Стрекаловская бэлиэтээтэ.