Мэҥэ Хаҥалас Тиэлиги сэлиэнньэтин «Хомпу» киинэ-видео оҥорор устуудьуйа аан дойду саамай саҥа дьыллааҕы киинэлэриттэн биирдэстэрин «Один дома-2» сахалыы тылбаастаата. Бу киинэни Степанида Борисова аатынан норуот айымньытын дьиэтин дириэктэрэ Давид Трофимов көҕүлэһининэн, үлэһиттэр Трофимова Валентина, Назарова Яна сахалыы тылбаастааннар уонна нэһилиэнньэ үгүс араҥата кыттыһан, оруоллары үллэстэн толорон таһаардылар.
Даҕатан эттэххэ, «Хомпу» киинэ-видео оҥорор, таҥар, уһулар устуудьуйа Тиэлиги кулуубар үлэлээбитэ ыраатта. Тиэлиги нэһилиэгин биир чаҕылхай талааннаах ыччата Давид Трофимов уһулбут киинэлэрэ, остуоруйалара: «Оҕо саас суох», «Таҥха түүн түүл», «Андыһыттар», «Морозко», «Золушка», сахалыы тылбаастаммыт мультиктара: «Кунг-фу Панда», «Босс молокосос» интэрниэт ситимигэр тарҕанан дьон биһирэбилин ылбыта. Бу «Один Дома — 2» киинэ сахалыы тылбаастаммыта төрөөбүт тылбыт сүппэтин, симэлийбэтин, ыччаппыт сахалыы тыынын илдьэ сылдьарын туһугар биир ый устата оҥоһуллан таҕыста.
Сүрүн дьоруой Кевин куолаһын Тиэлиги оскуолатын 5–с кылааһын үөрэнээччитэ Дьулуур Михайлов, кэккэ оруоллары нэһилиэк талааннаах дьоно-сэргэтэ, ыччата, оҕолоро саҥардылар.
Сотору бу сахалыы тыыннанан тахсыбыт, буруолуу сылдьар киинэ куйаар ситимигэр тарҕанан көстүөҕэ, киэҥ араҥаҕа тахсыаҕа.