Бүгүн, кулун тутар 25 күнүгэр, биллиилээх хореограф, Россия үтүөлээх артыыһа, режиссер Егор Дружинин Muus uSTAR ыччат бэстибээлин чэрчитинэн маастар-кылаас ыытта.
Манна кини биир идэлээхтэригэр үҥкүү туруорааччы тус туругар тохтоото.
«Киһи толкуйдаабытын ыраатыннарбакка олоххо киллэрэн иһиэхтээх. Үҥкүү — диэн киһи туруга. Идэ быһыытынан ыллахха үҥкүүһүт диэн уустук өйдөбүл», — диэтэ кини.
Кулун тутар 25-26 күннэригэр Дьокуускайга «Muus uSTAR» өрөспүүбүлүкэтээҕи бэстибээл ыытыллыаҕа.
Тэрээһин ыытааччылара — Антон Комолов уонна Михаил Башкатов. Кинилэри кытары Саха сириттэн куонкурус нөҥүө талыллыбыт ыытааччылар бэстибээли иилээн-саҕалаан ыытыахтара. Сүрүн ыалдьыттар — ырыаһыт Клава Кока, хореограф Егор Дружинин, режиссер Алексей Учитель, «Союзмультфильм» дириэктэрэ Борис Машковец уонна олимпийскай чемпионнар.
Быйыл бэстибээл бырагырааматыгар 12 хайысха киирдэ, ол иһигэр кинематограф, анимация, киберспорт, муода, суруналыыстыка, наука, экология уо.д.а. Muus uSTAR тэрээһин чэрчитинэн Россия ыччатын грант куонкуруһун тэрийиэхтэрэ.