Быйыл Үөһээ Бүлүүгэ ыытыллар Олоҥхо Ыһыаҕын бэлиэтин бигэргэттилэр. Бу туһунан СӨ култуура уонна духуобунай сайдыы министиэристибэтин пресс-сулууспата иһитиннэрэр.
Бэлиэ ааптара Үөһээ Бүлүү Намыттан төрүттээх худуоһунньук Геннадий Былков буоларын СӨ култуура уонна духуобунай сайдыы миниистирин бастакы солбуйааччыта Владислав Левочкин эттэ. Геннадий сахалыы оһуордаах мас оҥоһуктары оҥорорунан биллэр.
«2022 сылга Олоҥхо Ыһыаҕа бэс ыйын 20-21 күннэригэр Үөһээ Бүлүүгэ буолуоҕа, билигин эбийиэктэри тутуу, тэрээһин хаамыытыгар бэлэмнэнии үлэтэ ыытыллар. Бэлиэтээн эттэххэ, Үөһээ Бүлүүгэ быйыл Ийэ тыл сылын биллэрбиттэрэ, бу өрөспүүбүлүкэҕэ Ийэ сылын уонна норуот култууратын нэһилиэстибэтин түмэр өйдөбүл быһыытынан көрүөххэ сөп», — диэтэ Владислав Левочкин.
Олоҥхо Ыһыаҕын бэлиэтигэр Хотун Бүлүү өрүһүн уобараһа ойууланар. Кини олоҕу саҕар ийэ сырдык уобараһын быһыытынан көстөр.
Уруһуйга Россия норуоттарын култуурнай нэһилиэстибэтин көрдөрөр национальнай киэргэл (илин-кэлин кэбиһэр) киирбит.
«Хотун Бүлүү алгыһын ылан, ытыһыттан Ытык Чыыбыстаан — Ийэ тыл иччитэ көтөн тахсыбыт. Чыычаах Олоҥхо ыһыаҕар дьону-сэргэни ыҥырар, сырдык айыыларга — орто дойду чэчирии сайдарын тиэрдэр. Алгыстаах сиргэ оһуохай үҥкүүтэ дьон түмсүүлээх буолуутун көрдөрөр», — диэн СӨ култуура уонна духуобунай сайдыы пресс-сулууспата иһитиннэрдэ.