Саха АССР 100 сылыгар аналлаах кылгас кээмэйдээх киинэ сценарийыгар куонкурус саҕаланна. Бу туһунан «Сахафильм» киинэ хампаанньатын пресс-сулууспата иһитиннэрэр.
Тэрээһин сыалынан, кылгас кээмэйдээх киинэни устууга бэйэлэрэ туспа көрүүлээх уонна интэриэһинэй тиэмэлээх 18-тан 35-гэр диэри саастаах саҕалааччы сценаристары, эбэтэр режиссердары өйөөһүн.
«Куонкуруска бастыҥ кылгас кээмэйдээх киинэни талыахтара, уһуна — биэс мүнүүтэттэн 20 мүнүүтэҕэ диэри. Үс бастыҥ сценарий харчынан бирииһи ылыаҕа», — диэн иһитиннэриигэ этиллэр.
Бастыҥ сценарийдар бырайыактарын олоххо киллэриини «Сахафильм» хампаанньа өйүөҕэ. Маны таһынан, кыайыылаахтары «Киинэ өрөспүүбүлүкэтэ» кылгас кээмэйдээх киинэ бэстибээлин куонкуруһугар ыҥырыахтара.
Сайаапкалары уонна сценарийдары respublika.kino@yandex.ru электроннай почтаҕа 2022 сыл кулун тутар 15 күнүгэр диэри ылыахтара. Тэрээһин «MUUS uSTAR 2022» бэстибээл чэрчитинэн ыытыллар.