2022 сыл кулун тутарыгар Саха АССР төрүттэммитэ 100 сылын көрсө Москва куоракка өрөспүүбүлүкэ күннэрэ ыытыллыахтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Алтынньы 21 күнүгэр Айсен Николаев миниистирдэр кэбиниэттэрэ, өрөспүүбүлүкэ биэдэмистибэлэрин салайааччылара уонна норуот дьокутааттара кыттыылаах мунньахха тэрээһин кэнсиэпсийэтин кытта билистэ. Саха сирин күннэрэ парламент икки палататынан ыытыллыаҕа, оттон сүрүн тэрээһин Федерация Сэбиэтигэр буолуоҕа, «Создаем будущее, сохраняя традиции» быыстапка аһыллыаҕа.
Онно өрөспүүбүлүкэҕэ олорор норуоттар култуураларын, историяларын уонна сүрүн ситиһиилэрин сырдатар интерактивнай «өйдөбүл көрүдүөрүн» оҥоруохтара. Оттон Судаарыстыбаннай Думаҕа Саха сирин билиһиннэрэр роликтары көрдөрөр экраннары туруоруохтара.
Айсен Николаев бу тэрээһин ыытыллара улахан суолталааҕын бэлиэтээтэ. Быыстапка «муҥутуур иһитиннэриилээх» буолуохтааҕын, ол эрээри сүрүн болҕомто бу күннэр чэрчилэринэн ыытыллар Федерация Сэбиэтин пленарнай мунньаҕар ууруллуохтааҕын эттэ.
Россия парламенын үрдүкү палататын мунньаҕын түмүгүнэн өрөспүүбүлүкэ социальнай-экономическай сайдыытын судаарыстыбаннай өйөбүлүн туһунан уурааҕы ылыныаҕа, ол бырайыагынан билигин миниистирдэр кэбиниэттэрэ уонна регионнааҕы парламент үлэлиир.
Бу бырайыакка федеральнай өйөбүлү эрэйэр тутаах боппуруостар киириэхтэрэ, ол иһигэр социальнай уонна инфраструктурнай эбийиэктэри тутуу.
Саха АССР тэриллибитэ 100 сылын бэлиэтиир туһунан ыйаахха дойду бэрэсидьиэнэ Владимир Путин илии баттаабыта. 2020 сылга федеральнай уонна өрөспүүбүлүкэ бүддьүөтүттэн үп-харчы тыырыллар сүрүн дьаһаллар былааннарын бигэргэппиттэрэ. Ону тэҥэ, баҕа өттүнэн үбүлүүр пуонда үлэлиир.
Маны таһынан, бэлиэ күҥҥэ анаан Саха сиригэр уонна тас өттүгэр араас бырайыактар олоххо киирэллэр — социальнай суолталаах эбийиэктэри туталлар уонна өрөмүөннүүллэр, архитектура пааматынньыктарын сөргүтэллэр, култуура уонна наука эйгэтигэр тэрээһиннэри, аахсыйалары ыыталлар.