Ахсынньы 1 күнүгэр Дьокуускайга саҥа дьыллааҕы харыйа уота сандаарар үөрүүлээх тэрээһинэ онлайн-көрүҥүнэн ыытыллыаҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Олоҕурбут санитарнай-эпидемиологическай балаһыанньанан олохтоохтор болуоссакка мусталлара көҥүллэммэт. Харыйа уотун уматыы үөрүүлээх тэрээһинэ көрдөрөр-иһитиннэрэр хампаанньалар нөҥүө быһа эпииргэ көстүөҕэ», — диэн иһитиннэриигэ этиллэр.
Бу күн Саха сирин бары улуустарыгар, оройуоннарыгар харыйалар уоттара сандаарыаҕа, саҥа дьыллааҕы тэрээһиннэр саҕаланан барыахтара. Өрөспүүбүлүкэ кэнниттэн салгыы дойду атын регионнара эстафетаны салҕыахтара.
Саҥа дьыллааҕы бэлиэ уотун уматыы сыллата Ленин аатынан болуоссакка, «Кыһын Саха сириттэн саҕаланар» Бүтүн Россиятааҕы бэстибээл чэрчитинэн ыытыллар.