Аммаҕа Саха АССР култууратын үтүөлээх үлэһитэ, концертмейстер, виртуоз-музыкант, талааннаах баянист, педагог уонна мелодист Гелярий Владимирович Сидоркевич төрөөбүтэ 80 сылыгар аналлаах «Чарующие звуки баяна» диэн өрөспүүбүлүкэтээҕи баянистар, аккомпаниатордар уонна гармонистар икки ардыларыгар күөн-күрэс иккис төгүлүн ыытылынна.
Гелярий Владимирович талааннах импровизатор музыкант эрэ буолбакка уопсастыбаннай эколог быһыытынан биллэрэ. Кини үтүө аатын үйэтитэн иккис дойду оҥостубут Амматыгар үгүс тэрээһин ыытыллар. Олортон биирдэстэринэн баянистар, аккомпаниатордар итиэннэ гармонистар икки ардыларыгар өрөспүүбүлүкэтээҕи күөн күрэс буолар.
Ол курдук, күрэх оҕолор, байааны сөбүлээн оонньооччулар итиэннэ профессионаллар диэн үс бөлөххө арахсан ыытылынна. Күрэх кыттыылаахтара бары да талааннаахтарын көрдөрөн, көрөөччүлэри сөхтөрүөн сөхтөрдүлэр.
Күөн күрэс гран-при кыайыылааҕынан дьүүллүүр сүбэ Дьокуускай куораттан сылдьар эдэр кэскиллээх баяниһы Степан Захаровы ааттаата уонна култуура салалтата олохтообут 80 тыһыынча суммалаах сертификатынан наҕараадалаата.
Күрэххэ кэлбиттэр бары анал ааттарга тиксэн өттүк харалаах, илии тутуурдаах тарҕастылар. Онтон тэрийэччилэр уонна дьүүллүүр сүбэ байаан оччоттон баччаҕа диэри сүппэккэ-оспокко сайдан иһэриттэн астыннылар.