Бүгүн, атырдьах ыйын 28 күнүгэр, «Окно в Европу» игровой киинэ 29-с бэстибээлигэр Саха сирин режиссера Михаил Лукачевскай туруорбут «Вертолет» киинэ аан дойдутааҕы премьерата Выборг куоракка буолуоҕа.
Киинэ дьиҥнээхтии буолбут түбэлтэлэргэ олоҕурар.
«Вертолет» киинэҕэ кыра оҕолоох ыал ыраах хоту бөһүөлэккэ олорор кырдьаҕас төрөппүттэрин кытта көрсүһэ барар. Онно тиийбиттэрин кэннэ, оҕолоро эмискэ дизентериянан ыалдьар. Бөһүөлэккэ сөптөөх эмп кыайан көстүбэт, төлөпүөн үлэлээбэт, айан суолун сааскы халаан уута алдьаппыт. Ону аҕалара санитарнай рейси ыҥырарга диэн оройуон киинигэр тиийэргэ быһаарынар.
Киинэни 2015 сылтан уһулан саҕалаабыттар. Сценарийы саха эстрадатын ырыаһыта Иннокентий Васильев-Лэгэнтэй суруйбут.
«Киинэ ис хоһоонун сүрүн сыала диэн дьиэ кэргэн сыһыанын туһунан өйдөбүнньүгү хаалларарга дьулуһуу буолла. Ол гынан баран, cүрүн тутула дьиҥнээхтии буолбут түбэлтэлэр туһунан барар. Ол курдук, 2013 сылга Усуйаана улууһугар бөртөлүөт саахала тахсыбыта. Онно 23 киһи олоҕо быстыбыта. Бу түбэлтэҕэ олоҕуран, тырааныспар сайдыбатах ыраах дэриэбинэлэр олохтоохторун ыарахан балаһыанньаларын туһунан сырдатарга диэн үлэ оҥоһулунна», – диэтэ кини.
Киинэни Өймөкөөн уонна Үөһээ Дьааҥы улуустарыгар уһулбуттара. Сүрүн оруолларга Олоҥхо Театрын артыыстара Гаврил Менкяров уонна Инга Леонова, ону тэҥэ Михаил Лукачевкай киинэлэригэр эрдэ уһулла сылдьыбыт Роман Атласов оонньоотулар.
Режиссер 2012 сылтан саҕалаан 13 үлэлээх. Саамай тахсыбыт киинэтэ — «Үрүҥ күн».
«Окно в Европу» — Россия былыргы национальнай киинэ бэстибээлэ, киинэ эйгэтигэр таһымнаах тэрээһиннэртэн биирдэстэрэ. 2020 сылга бэстибээл Гран-при хаһаайына Степан Бурнашев «Хара хаар» диэн сахалыы киинэ буолбута.