Бүлүү куоракка Англия амарах сиэстэрэтэ Кэт Марсденҥа анаммыт мурал баар буолла. Бу туһунан куорат дьаһалтатын пресс-сулууспата иһитиннэрэр.
«Уруһуйдьут Григорьев Александр Васильевич-Сандалы уонна Туйаара Геннадиевна Бүлүү куорат дьаһалтытан кытта үлэни аҕыс күн иһигэр түмүктээтилэр. Дьаһалта кыраан үлэтин толору уйунна уонна уруһуйдьуттары бары ирдэнэр тээбириннэринэн уонна олорор дьиэнэн хааччыйда», — диэн этиллэр.
Үлэ Былатыан Ойуунускай аатынан саха академическай тыйаатырын сүрүннүүр худуоһунньуга, саха норуодунай поэта Иван Гоголев-Кындыл кыыһа Лена Гоголева эскииһинэн уонна үбүнэн өйөөһүнүнэн ыытылынна.
1892 сыллаахха Бүлүү куоракка араҥ ыарыынан ыалдьыбыт дьоҥҥо көмөҕө кэлбит Кэт Марсден мэтириэтэ Бүлүү куорат Мира уулуссатын 108г №-дээх дьиэтин киэргэттэ.
«Билигин аан дойду үрдүнэн пандемия бара турар кэмигэр, дьон доруобуйатын быыһыыр туһуттан сиэртибэлээһин тиэмэтэ ордук суолталаах. Англия кыыһа Кэт Марсден оннук этэ. Барыбытыгар доруобуйаны, дьолу- соргуну баҕаран туран, биһиги кинини көтөн иһэр эрэл курдук үрүҥ көтөрдөрү кытта ойуулаатыбыт. Муралга ону тэҥэ Сибэтиэй Пантелеймон сиэркэбэ, сиэстэрэ кыыһы арыалыыр сылдьар итэҕэл быһыытынан ойууланна. Илиитигэр чэчирии сайдыыны уонна этэҥҥэ буолууну ойуулуур саха оһуорун быһыылаах умайа сылдьар шары тутан турар», — диэн Лена Гоголева кэпсээтэ.