Бүгүн оҕолор А.Е. Кулаковскай аатынан норуоттар доҕордоһууларын дьиэтигэр бастыҥ хор күрэскэ кыттыыны ылаары муһуннулар.
«Дьокуускайга эбии үөрэхтээһин уонна оскуола үөрэнээччилэрэ бастыҥ хор күрэскэ кыттыыны ылыахтара. Кыттыылаахтар улуус таһымнаах күрэҕин кыайыылаахтара буолаллар. Эдэр дьоҕурдаах оҕолор өрөспүүбүлүкэ биир бастыҥ сыанатыгар сатабылларын көрдөрүөхтэрэ. «Дойдум ырыалара» күрэс төрөөбүт дойдуну таптыырга, бэриниилээх буоларга үөрэтэр. Онон күрэс ыччат дьон төрөөбүт дойдуга бэриниилээх буола улааталларыгар тирэх буолар», — диэн Саха сирин бырабыыталыстыбатын салайааччытын солбуйааччы Ольга Балабкина иһитиннэрдэ.
Улуустааҕы түһүмэх кыайыылаахтара — Үөһээ Дьааҥы улууһуттан «Дуолан», Амма улууһуттан «Дьулуур», Мэҥэ Хаҥалас улууһуттан «Ымыычаан», Жатайтан «Хор Первых», Дьокуускай куораттан «Веселые нотки» уонна «Сайдыына» хор бөлөхтөрө буолаллар.
Алын сүһүөх оҕолоро, 5-7 кылаас уонна 8-11 кылаас үөрэнээччилэрэ күрэскэ кыттыыны ылыахтара.
Дьүүллүүр сүбэнэн буолаллар Г.М. Кривошапко аатынан СӨ судаарыстыбаннай филармониятын симфоническай хорун сүрүн хормейстерэ, Экспертнэй сүбэ бэрэсэдээтэлэ Людмила Шумилова, СӨ судаарыстыбаннай филармониятын симфоническай хорун солиһа, өрөспүүбүлүкэ култууратын туйгуна Валентина Готовцева, «Музыка для всех» бырайыакка «Бастыҥ муусука учуутала» номинация кыайыылааҕа Надежда Макарова, култуура үтүөлээх үлэһитэ, учуутал уонна хормейстэр Владимир Индигирский, М.Н. Жиркова аатынан Дьокуускайдааҕы муусука колледжын преподавателэ, бүтүн россиятааҕы уонна бүтүн аан дойдутааҕы творческай күрэстэр лауреата Мария Степанова.
Ил Дархан Айсен Николаев Оҕо саас сылын биллэрбит чэрчитинэн «Музыка для всех» өрөспүүбүлүкэтээҕи бырайыак Бэрэсэдьиэн «Үөрэҕэрии» национальнай бырайыагынан «РФ олохтоохторугар патриотическай иитии» федеральнай бырайыак чэрчитинэн «Мин дойдум ырыалара» күрэс ыытыллар.
Санатан эттэххэ, бастыҥнар хамсааһыннарын үлэтэ оҕону бары өттүттэн сайыннарар ону таһынан сөптөөх хайысханан сирдээн биэрэр. Ил Дархан Айсен Николаев бэлиэтииринэн, өрөспүүбүлүкэ оҕолоро бастыҥнар хамсааһыннарыгар көхтөөх холобур буолаллар. Дойду бэрэсидьиэнэ Владимир Путин көҕүлээһининэн тэриллибит «Бастыҥнар хамсааһыннара» бырайыак эдэр ыччаты тэрээһиннэргэ кытыннарыыта Саха сиригэр 26% үрдээбитэ бэлиэтэннэ.