Британия Klassiki.online киинэ-тыйаатырыгар саха киинэтин сезона саҕаланыаҕа — үс нэдиэлэ устата түөрт киинэ сүрэхтэниэҕэ. Бу туһунан «Сахафильм» пресс-сулууспата иһитиннэрэр.
Хас биирдии киинэ режиссердарын уонна киинэ артыыстарын кытта интервьюлаах ааһыаҕа.
Ол курдук, алтынньы 14 күнүгэр, Москваҕа ыытыллыбыт 40-с норуоттар икки ардыларынааҕы киинэ бэстибээлин кыайыылааҕа уонна норуоттар икки ардыларынааҕы араас киинэ бэстибээллэрин лауреаттара Эдуард Новиков «Тойон кыыл» үлэтэ тахсыаҕа.
Алтынньы 21 күнүгэр, норуоттар икки ардыларынааҕы уонна россиятааҕы киинэ бэстибээллэригэр наҕараадаламмыт «Мин үрдүбэр күн хаһан да киирбэт» Любовь Борисова киинэтэ көстүөҕэ.
Алтынньы 28 күнүгэр Анатолий Васильев «Сайылык» киинэтэ көрөөччү дьүүлүгэр тахсыаҕа. 1992 сыллаахха уһуллубут киинэ, күн сириттэн туораабыт киһи дууһата кыайан анараа дойдуга аттаммакка сылдьарын туһунан. Киинэ Пусанскай норуоттар икки ардыларынааҕы киинэ бэстибээлин анал бырагырааматыгар кыттыбыта.
Сэтинньи 4 күнүгэр, Дмитрий Давыдов ImagineNATIVE бэстибээл кыайыылааҕа уонна норуоттар икки ардыларынааҕы араас киинэ бэстибээллэрин лауреата — «Костер на ветру» киинэтэ көстүөҕэ.
Киинэлэри Великобритания уонна Хотугу Ирландия эрэ олохтоохторо көрүөхтэрин сөбө бэлиэтэнэр.
Маны таһынан, алтынньы 30 күнүгэр, тас дойду киинэ эйгэтигэр үлэһиттэрин кытта саха киинэтин туһунан төгүрүк остуол былааннанар. Маны барытын онлайн, ону тэҥэ, сайтка көрүөххэ сөп буолуоҕа.
Klassiki.online — сэбиэскэй уонна онтон бэттэх сыллааҕы киинэ классикатын үөрэтэргэ аналлаах академическай платформа. Манна Россия, Кавказ уонна Орто Азия киинэлэрэ бааллар.