Саха сирин мунньуллубут күндү кылаатын кэрийэ сылдьан көрдөрөр быыстапка Кузбасска арылынна, экспозиция судаарыстыбаннай кыраайы үөрэтэр түмэлгэ турда.
Киин экспонатынан «Азия оҕолоро» II кыһыҥҥы спортивнай оонньуулар эмблемата буолла. Эмблема 263,16 карааттаах алмаастарынан уонна 421,89 карааттаах дьэрэкээн өҥнөөх күндү таастарынан киэргэтиллибит.
Быыстапка үөрүүлээх аһыллыытыгар Сибиир федеральнай уокуругар РФ бэрэсидьиэнин боломуочуйалаах бэрэстэбиитэлэ Анатолий Серышев, РФ спортка миниистирэ Олег Матыцин, дойду Олимпийскай кэмитиэтин бэрэсидьиэнэ Станислав Поздняков, Кемеровскай уобалас губернатора Сергей Цивилев, СӨ үпкэ миниистирэ Валерий Жондоров уонна регион Гохранын салайааччыта Иван Кычкин кытыннылар.
Ол курдук, РФ бэрэсидьиэнин боломуочуйалаах бэрэстэбиитэлэ Анатолий Серышев күндү кылааттары үрдүктүк сыаналаата, бүтүн дойду баайынан-дуолунан ааттаата. Быыстапка «Азия оҕолоро» оонньуулар култуурунай бырагырааматын чааһа буолар. Кемеровскай уобалас губернатора Сергей Цивилев бэлиэтээбитинэн, оонньуулары Кузбасска тэрийии туһунан быһаарыы регионнар бииргэ үлэлэһэллэрин чэрчитинэн ылыллыбыт.
Ону тэҥэ, Сергей Цивилев аныгыс ыытыллар «Азия оҕолоро» оонньууларга «Саха сирин мунньуллубут күндү кылаата» быыстапка баар буолуон наада диэн эттэ.