Абый улууһугар федеральнай бырагыраама чэрчитинэн агро оскуолаҕа хапытаалынай өрөмүөн оҥоруохтара.
Абый соҕотох агро оскуолата Сутуруоха сэлиэнньэтигэр баар. СӨ бырабыыталыстыбата педагогтары кытары кэпсэттэ, оскуола туругун сыаналаата. Икки этээстээх мас тутуу сэбиэскэй кэм саҕаттан турар уонна билиҥҥи ирдэбиллэргэ эппиэттээбэт туруктаах.
Оскуола өрөмүөнэ «Оскуолалары саҥардыы» бырайыагынан ыытыллыаҕа. Эбийиэк 2023 сыл үлэ былаанын испииһэгэр киирдэ. Оскуола дириэктэрэ Изольда Стручкова этэринэн, бырайыактаах, сметалаах докумуон былырыын оҥоһуллан бүппүт. Билигин испииһэккэ эбии ыытыллар үлэлэри суруйаллар, ПСД көннөрөллөр, судаарыстыбаннай экспертиза быһаарыытын бу саас ыларга былаанныыллар.
Ону таһынан спорт саалатыгар эмиэ хапытаалынай өрөмүөн наада. Төһө да дьиэтэ эргэрбитин иһин, дьарыктар ыытыллаллар. Маныаха оҕолор эрэ буолбакка көхтөөх эдэр ыччат эмиэ дьарыктанар. Бу кыһалҕаны быһаарарга СӨ бырабыыталыстыбатын чилиэннэрэ эппиттэринэн, икки суол баар: биирэ — «Оскуолалары саҥардыы» бырагырааманан, иккиһэ – «Үтүө дьыалалар» өрөспүүбүлүкэтээҕи бырагырааманан.
Ураһалаах оскуолатыгар 47 оҕо үөрэнэр. Оскуоланы бүтэрэн баран оҕолортон үгүстэрэ хайысхаларын уларыппакка тыа хаһаайыстыбатын идэлэрин талаллар эбит. Үлэҕэ оскуола эрдэхтэн сыстан уһуйуллаллар. Онно аналлаах усулуобуйа барыта баар. Сүөһүлэри, оҕуруоту көрөллөр. Ол иһин оскуола остолобуойа бэйэ аһынан хааччыллар.