Аҕа саастаах дьон күнүн көрсө, өрөспүүбүлүкэтээҕи кырдьаҕастар уонна инбэлииттэр интернат-дьиэлэригэр муусука диискэтин сүрэхтээтилэр. Бу хомуурунньукка олохтоохтор ырыаларын түмэн киллэрбиттэр.
Уус Алдантан төрүттээх ырыа куттаах Иван Васильев кырдьаҕастар уонна инбэлииттэр интернат-дьиэлэригэр 2012 сылтан үлэлиир. Идэтинэн — баянист. Танда кулуубугар баянист, концертмейстер быһыытынан айбыта-туппута. Ол кэннэ Түүлээх нэһилиэгэр норуот айымньытын дьиэтин дириэктэринэн үтүө суобастаахтык үлэлээбитэ. Иван Афанасьевич билигин өрөспүүбүлүкэтээҕи интернат дьиэҕэ ансаамбыл үлэлэтэр. Маны тэҥэ кини хоп курдук сыананы киэргэтэр, декорация уруһуйдуур.
«Декадаларга, бырааһынньыктарга күҥҥэ арыт иккилии-үстүү кэнсиэргэ кытталлар. Ким ханнык ырыаны ыллыан баҕарарынан булан биэрэбит. Интэриниэт эҥин баар буолан, ырыа тылларын да буларга чэпчэки», — диир Иван Васильев.
Интернат олохтоохторо Иван Афанасьевичка олус сөбүлээн, умсугуйан туран дьарыктаналлар.
Дьэ, бу курдук олохтоохтор биир да күн чуҥкуйан сыппаттар. Хас биирдии бэлиэ күнү көрсө, кэнсиэр тэрийэллэр, улуустарынан гастролга сылдьаллар. Онуоха олоххо тардыһыы да күүһүрэр, күннээҕи түбүк да умнуллар.
Олохтоохтор өссө 2013 сыллаахха бастакы хомуурунньуктарын сүрэхтээбиттэрэ. Онно 12 ырыа киирбит буоллаҕына, быйылгы диискэҕэ номнуо 21 ырыа киирбит. Ол диискэлэри бэйэлэрэ ылбыттар итиэннэ гастролга бэлэх быһыытынан илдьэ бараллар.