Марина доруобуйаны көннөрүнэр араас хайысхалаах үҥкүүнү кэрэ аҥардарга ыыппыта номнуо 17 сыл буолбут. Манна үксүн биэнсийэ иннинээҕи саастаах уонна биэнсийэлээх «кыргыттар» сылдьаллар. Бары араас дьарыктаах, олохтоох ийэлэр, эбэлэр бу кулуубка кэлэн эттэрин-хааннарын эрчимирдэн, сэргэхсийэн, уйулҕаларын тупсарыналлар.
“Киһи олоҕо олус түргэнник устар, күннээҕи түбүк, үлэ быыһыгар кэрэ аҥар бэйэтигэр бириэмэтин ууруммат түгэннэрэ элбэх. Ол курдук миэхэ эдэр сылдьан үҥкүүлүөн баҕарбыт эрээри онтун толорботох, олохторугар хаһан да үҥкүүлээн да көрбөтөх кыргыттар элбэхтэр. Онон хамсаныыларбыт судургулар, ким баҕар үҥкүүлүүр кыахтаах. Түмсүүбүт сүрүнэ: чопчу тиэхиньикэни чочуйуу диэн буолбатах, хамсанан, хааны эргитэн, сэргэхсийии уонна дуоһуйууну ылыы буолар. Биһиги олус түмсүүлээхпит. Дьарыкпыт таһынан айылҕаҕа, араас тэрээһиннэргэ, омук да сиригэр тиийэ сылдьабыт. Биэс сыл тухары 17 флэш-моб үҥкүүлээтибит. Үксүн кыттааччылар көҕүлээһиннэринэн тахсар, кинилэр куруук саҥа идеялаах, этиилээх буолаллар. Бу кыргыттары мин үҥкүүгэ үөрэтэбин диэн буолбакка – кинилэргэ үҥкүүлүүр кыаҕы, дьолу биэрэбин, онтон олус дьоллонобун”, — диэн Марина киэн тутта, астына кэпсиир.