Режиссер Михаил Барынин «24 снега» диэн Арктикаҕа олорор саха сылгыһытын туһунан документальнай киинэтэ муус устар 8 күнүттэн Россия үс улахан куоратын, Санкт-Петербург «Антеглер», Москва «ЦДК» уонна Новосибирск «Победа» кинотеатрдарыгар көстүөҕэ.
Киинэҕэ олоҕун улахан аҥарын туундараҕа сылгы үөрүн көрөн олорор сылгыт Сергей туһунан кэпсэнэр. Сылтан сыл аайы дэриэбинэттэн тэйиччи сылдьара уһаатар уһаан иһэр, дьиэ кэргэнин кытта сылга биирдэ эмэтэ көрсөр. Хоту дойду олоҕо-дьаһаҕа, үлэтэ-хамнаһа төһө да ыараханын иһин, сүрүн дьоруой дьоллоох.
Киинэ 2016 сыллаахха «360 кыраадыс» научно-популярнай киинэ бэстибээлин уонна «Киһи уонна айылҕа-2016» XV-с Байкаллааҕы норуоттар икки ардыларынааҕа документальнай киинэ бэстибээлин Гран-При хаһаайыннара буолбута. 2017 сыллаахха 38-с Москватааҕы норуоттар икки ардыларынааҕы киинэ бэстибээлин көрөөччү биһирэбилэ бирииһин уонна XVII-с «Флаэртиана» бэстибээлгэ ураты уус-уран быһаарыы «Үрүҥ көмүс Нанук» бирииһи ылбыта. Ону тэҥэ «Спутник над Польшей» X-с Россия киинэтин бэстибээлигэр дьүүллүүр сүбэ анал бирииһинэн, «Киһи уонна айылҕа-2016» XV-с Байкаллааҕы норуоттар икки ардыларынааҕа документальнай киинэ бэстибээлин эдэр дьүүлүүр сүбэтин бирииһинэн бэлиэтэммитэ.
«Эхо Москвы» киинэлэри ырытааччыта, политик Дарья Митина бу киинэни «айылҕаҕа гимн» диэн аатаабыта.
«Айылҕаҕа уонна кинини баһылыыр-көһүлүүр киһиэхэ гимн (Саха сирин Арктикатын ньуурдарын кэрэ көстүүлэрэ, ирбэт тоҥ бары сокуонунан уонна чөл өй-санаа өттүнэн тыынар тыыннаах хаалыа суох сиригэр, киһи олорор уонна өссө хаһаайыстыба иитэр)», — диэн кини 2016 сыллаахха бэйэтин блогугар суруйбута.
Кинокритик оператор үлэтин, киинэ философиятын, сүрүн дьоруой уратытын, олус артыыһын бэлиэтээбитэ.