Сэтинньи 29 күнүгэр Уус Алдан улууһун Найахы нэһилиэгэр ыраах Таас Дьааҥы эҥсиллэр куоластаах ырыаһыта, олоҥхону айааччы, суруйааччы, утум олоҥхоһут, Дьааҥы биир биллэр олоҥхоһута Гаврил Слепцов-Хаһаах оҕонньор сиэнэ, дьиҥ сахалыы тыыннаах кэпсээннээх, айдарыылаах, талааннаах ырыаһыт, олоҥхоһут Саргылана Слепцова-Хатан Кылаан уонна Бэйдиҥэ сынньалаҥ киинин дириэктэрэ, Олоҥхо ыһыахтарын кыттыылааҕа, призера Игнат Слепцов ыалдьыттаатылар.
Ыалдьыттар И.И. Артамонов аатынан Найахы сынньалаҥ киинигэр кэнсиэр көрдөрдүлэр. Саала сахалыы таҥастаах көрөөччүлэринэн, үөрэнээччилэринэн туолла. Саргылана Семеновна олоҥхо диэн тугун, хайдах толоруллуохтааҕын, олоҥхону кэпсээн, сахалыы ыллаан-туойан дьон интириэһин тарта.
Тэрээһини Найахы сынньалаҥ киинин иһинэн тэриллибит «Дьүрүскэн» хомусчуттар бөлөхтөрө, «Чэчир» оҕо саадын улахан бөлөҕүн иитиллээччитэ Элла Протопопова олоҥхону толорон киэргэттилэр.