2023 сыл муус устарыгар Аллараа Халыма Черскэй бөһүөлэгэр ыытыллар табаһыттар норуоттар икки ардыларынааҕы чемпионатыгар 150-тан тахса киһи кыттыа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Маннык хабааннаах күрэхтэһии Россияҕа бастакытын ыытыллара бэлиэтэнэр.
«Биһиги өрөспүүбүлүкэбитигэр таба иитиитигэр, племенной үлэҕэ, мэччирэҥи харыстааһыҥҥа, кадрынан хааччыйыыга уонна Хотугу сир төрүт олохтоох аҕыйах ахсааннаах норуоттарын үгэстэрин харыстааһыҥҥа улахан болҕомто ууруллар. Маннык көҕүлээһиннэри өйүүллэрэ улахан суолталаах. Ол курдук, Черскэйгэ үгэс буолбут табаһыттар чемпионаттара Россия Арктическай Сэбиэтин дьаһалларын бырагырааматыгар киирдэ», — диэтэ Ил Дархан Айсен Николаев.
Күрэхтэһии анал оҥоһуллубут сиргэ тэриллиэҕэ. Билигин чемпионакка бэлэмнэнии быһыытынан чемпионат эбийиэктэрин тутуу, өрөмүөннээһин үлэтэ ыытыллар.