Оҕо мультипликационнай киинэтин аһаҕас IX-с бэстибээлигэр «Харысхал» пуонда сайаапкалары салгыы тутар. Бу туһунан тэрилтэ пресс-сулууспата иһитиннэрэр.
«Бу куонкуруска оҕо мультипликационнай киинэтин оҥорор устуудьуйалар, оҕо уһуйааннара уонна үөрэх тэрилтэлэрэ, дьиэ кэргэн устуудьуйалара кыттыыны ылыахтарын сөп», — диэн иһитиннэриигэ этиллэр.
Кыттааччы сааһа — 18 сааһыгар диэри.
Үлэ 2021 балаҕан ыйын 1 күнүттэн бэтэрээ оҥоһуллубут буолуохтаах. Кээмэйэ — үс мүнүүтэ иһинэн.
Быйыл маннык анал ааттары олохтоотулар: «Кылаан бириис», «Россия норуоттарын нэһилиэстибэтэ», «Сахам сирэ», «Ийэ кыһамньыта», «Төрөөбүт дойдугун харыстаа», «Көмүс илии», «Пластилин эйгэтэ», «Матрица», «Саамай эдэр мультипликационнай киинэни айааччы», «Көрөөччүлэр биһирэбиллэрэ».
Үлэлэри муус устар 25-тэн ыам ыйын 31 күнүгэр диэри туталлар.
Куонкуруска кыттарга сайаапканы толорон мульткиинэни кытта dobrosakha@mail.ru электроннай почтаҕа ыытыллар. Түмүгү dobrosakha.ru сайтка уонна «ВКонтакте» социальнай ситимҥэ таһаарыахтара. Наҕараадалааһын бэс ыйын 14 күнүгэр буолуо.
Сайаапка халыыбын уонна куонкурус балаһыанньатын бу ссылканан киирэн хачайдаан ылыахха сөп.