Россияҕа балаҕан ыйын үһүс өрөбүлүгэр ойуур хаһаайыстыбатын үлэһиттэрин күнэ бэлиэтэнэр. Быйыл бу күн балаҕан ыйын 17 күнүгэр түбэстэ. Бэлиэ күн 1970 сыллартан ойууру туһаныы сокуонун ылыныы олоххо киирэн олоҕурбут кэмиттэн киэҥник бэлиэтэнэр буолбута. Ойуур харыстабылын үлэһиттэрэ тулалыыр айылҕаны, баай хара тыаны харыстыыр, араҥаччылыыр аналлаах, көҥүлэ суох мас кэрдиитин хонтуруоллуур сыаллаах, ойуур кодексынан сирдэтэн, СӨ ойуур сыһыаннаһыыларын дэпэртээмэнин кытары ыкса ситимнээхтик үлэлииллэр.
Саха сиригэр ойуур хаһаайыстыбатыгар идэлэригэр бэриниилээх, үрдүк таһымнаах исписэлиистэр үлэлииллэр. Кинилэри кытта, кинилэр үлэлэрин туһунан биһиги бүгүн кэпсэтиэхпит.