Нуучча православнай таҥаратын дьиэтин бэрэстэбиитэллэрэ, Александр Невскэй туһунан киинэ оҥорон таһаарар туһунан, Россия култуура министиэристибэтигэр таҕыстылар. Бу туһунан ТАСС иһитиннэрэр.
Иһитиннэриини култуураҕа Патриаршай сүбэ бэрэссэдээтэлэ митрополит Пскавскай уонна Порховскай Тихон (Тихонов) тириэртэ.
«Биһиги култуура министиэристибэтигэр, ыарахан кэмнэргэ бэйэтин норуотун интэриэһин көмүскээбит уонна араҥаччылаабыт, бэйэтин дойдутун историческай суолун харыстаабыт киһи туһунан өссө биир киинэни оҥорорго этии киллэрдибит», — диэтэ кини.
Россияҕа кинээс Александр Невскэй үбүлүөйүн чэрчитинэн тэриллибит «История России глазами художников» быыстапка Саҥа Третьяковкаҕа тэрилиннэ.
Митрополит этэринэн, Невскэй 19 үйэ саҕанааҕы худуоһунньуктар хартыыналарыгар уонна киинэлэригэр «сиппит-хоппут эр киһи» быһыытынан көстөр, ордук сэбиэскэй режиссер Сергей Эйзенштейн 1938 сыллааҕы киинэтигэр. Онуоха, бэлиэтээн эттэххэ, Неваҕа киирсиигэ кинээс 19 саастааҕа, оттон Чудской күөлгэ киирсиигэ — 21-дээҕэ.
Владыка этэринэн, Невскэйи хайдах баарынан көрдөрөр улахан суолталаах, үүнэр көлүөнэни патриотическай иитиигэ көдьүүстээх.