Опера уонна балет тыйаатырын «Сказка братьев Гримм» туруоруута, сэтинньи 11 күнүгэр, Санкт-Петербург куоракка буолбут «Онегин-2021» опера бириэмийэтин анал аатын кыайыылааҕа буолла.
Саха испиктээкилэ кыайыытын «Событие. Традиции и современность» анал аакка «Урал Опера Балет» тыйаатырын «Любовь издалека» туруоруутун кытта үллэһиннэ.
«Саха тыйаатыра бу испиктээкил нууччалыы туруоруутун Россияҕа аан бастаан туруорбута хайҕаллаах. Бу опера биһиги эрэ тыйаатырбыт репертуарыгар киирэр, оттон Мюнхен куоракка оригинала баар», — диэн тыйаатырга кэпсээтилэр.
Испиктээкил ааптардара бэлиэтииллэринэн, туруоруу уратытынан, операҕа дуэт суох, үксүгэр хор кыттар. Артыыстар ыллыылларын таһынан кэпсэтэллэр.
2021 сылга бастыҥнары идэтийбит дьүүллүүр сүбэни кытта бастакытын опера искусствотын сэҥээрээччилэр эмиэ таллылар. «Фаворит» көрөөччү анал бирииһин Евгений Колобов аатынан «Новая опера» Москва тыйаатырын солисткатыгар Полина Шамаеваҕа Кармен оруолун иһин туттардылар уонна Пермь куорат «Трикстер» тыйаатырын «Орфей и Эвридика» испиктээкилигэр.
Быйыл «Онегин» тэрийэр кэмитиэт уопсайа Россия үрдүнэн 25 тыйаатыр 98 сайаапкатын көрдө.