Саха сиригэр анимация акселератора арыллыа

2025 сылга Саха сиригэр анимация акселератора арылларын туһунан Ил Дархан Айсен Николаев Анал туһаайыытыгар иһитиннэрдэ.

Итини таһынан, Ил Дархан эппитинэн, 2026 сылга “Үлэ кварталын” иһинэн ойуулук кластера (мультипликация) арыллыахтаах. Саха сиригэр кэлиҥҥи кэмҥэ балтараа төгүл элбэх анимация контена оҥоһуллар буолбут.

“Дьон-сэргэ үөрэтэр, иитэр ойуулуктан уонна киинэттэн олус үөрэр. Өрөспүүбүлүкэбитигэр балтараа төгүл элбэх анимация контена оҥоһуллар буолла. Төрөөбүт тылынан саҥарар ойуулуктар “Тооку” оҕо ханаалыгар көстөллөр. 2025 сылга анимация акселератора, оттон 2026 сылга “Үлэ кварталыгар” ойуулук кластера арыллыаҕа. Биһиги кинемотографистарбыт ситиһиилэринэн киэн туттабыт. Быйыл Арассыыйа киинэтигэр бэриллэр омук наҕараадаларын хас бэһис бириэмийэтин саха киинэлэрэ ыллылар”, – диэтэ кини.

Быйыл өрөспүүбүлүкэбитигэр барыта 375 мүнүүтэ усталаах анимация оҥоһуллубут. 2023 сыллаахха 250 эрэ мүнүүтэ этэ. Саха сирин анимацията норуоттар икки ардыларынааҕы биһирэбили ылар: быйыл өрөспүүбүлүкэҕэ араас таһымнаах анимация бэстибээлин 14 наҕараадата уонна анал аата кэллэ. “Тундра” устуудьуйа “Знай наших” бренд куонкуруһун кыайда.

Ил Дархан 2024 с. муус устардааҕы ыйааҕын быһыытынан, анимацияны оҥорууну 10 төгүл элбэтиллиэхтээх – сылга 2500 тыһыынча мүнүүтэ. 2030 сылга диэри айар-тутар (креативнай) индустрияҕа барыта 70-ча тыһыынча киһи үлэлиир буолуохтаах. Ону таһынан, былаан быһыытынан, айар-тутар индустрия баалабай сыанатын 45 млрд солкуобайтан 90 млрд солкуобайга диэри улаатыннарыахтаахтар.

ТАР5АТ: