Саха сирин биллиилээх суруйааччылара Владимир Федоров, Николай Лугинов уонна Елена Степанова «ЛИterra» диэн саҥа литературнай интернет былаһаакканы таһаардылар. Бу туһунан СӨ култуураҕа министиэристибэтин пресс-сулууспата иһитиннэрэр.
«ЛИterra» электроннай сурунаал олорор сирдэриттэн уонна айар союстарга сыһыаннарыттан тутулуга суох талааннаах поэттары, прозаиктары, драматургтары, публицистары, ырытан көрөөччүлэри түмэр сыаллаах айылынна. Ону тэҥэ Россияҕа эрэ айар-тутар суруйааччылары буолбакка, тас дойдуларга үлэлии-хамныы сылдьар биир дойдулаахтарбытын, Хотугу уонна Арктика аҕыйах ахсааннаах төрүт норуоттарын бэрээстэбиитэллэрин өйүүр соруктаах», — диэн этиллэр.
Саҥа саҕалаан эрэр ааптардар эмиэ бэйэлэрин айымньыларын таһаарыахтарын сөбө ыйыллар. Сурунаал сүрүн таһаарыылара ый 1-2 күннэригэр саҥардыллыахтара, онон редакция матырыйааллары ааһан эрэр ый 15-25 чыыһылаларыгар ыытары көрдөһөр.
Сурунаалга таһаарыы босхо, ол эрээри матырыйаал кээмэйигэр хааччахтаах. Саҥа интернет былаһаакка үлэтин саҕалаабыт маҥнайгы күннэригэр, хайыы үйэ тыһыынчаттан тахса киһи көрбүтүн министиэристибэ бэлиэтиир.