Дойду бэрэсидьиэнэ Владимир Путин сорудаҕынан, Муусука Үрдүкү оскуолатын комплексын тутуутун 2026 сыл түмүктэниэр диэри бүтэриэхтээхтэр.
Ил Дархан Айсен Николаев Ил Түмэҥҥэ туһаайыытыгар бэлиэтииринэн, өрөспүүбүлүкэҕэ култуураҕа, үрдүкү искуустубаҕа дьону-сэргэни тардарга үчүгэй усулуобуйалар оҥоһуллуохтаахтар. Онон 2024 сыл бу сыалы-соругу олохтуурга суолталаах буолуохтаах.
Муусука Үрдүкү оскуолатын иэнэ — 9,5 тыһ кв миэтэрэ. Манна 240 миэстэлээх үөрэх корпуһа уонна 150 миэстэлээх интернат баар буолуохтара. Ону таһынан эбиийэккэ улахан кэнсиэр саалата, бибилэтиэкэ, звукозапись устуудьуйата, фонотека кабинеттара, спортивнай уонна оҕо былаһааккалара көрүллүөхтэрэ.
Муусука Үрдүкү оскуолата ааспыт сылга үбүлүөйдээх 30 сааһын туолбутун үөрэх уонна билим үлэтигэр проректор Светлана Вдовенко санатта.
«Бу кэм устата оскуоланы элбэх оҕо бүтэрдэ. Кинилэринэн оскуола киэн туттар. Холобура СӨ балетын уонна оператын тыйаатырын уус-уран салайааччыта, дирижера Павел Васьковскай биһиги оскуолабытын бүтэрбитэ. Маннык үөрэнээччилэрбит элбэхтэр. Кинилэр өрөспүүбүлүкэҕэ, дойдуга уонна дойду таһыгар үлэлии-хамныы сылдьаллар. Бүгүҥҥү күҥҥэ оскуола күүскэ сайынна. Элбэх айар, үөрэх бырайыактардаахпыт. Онон саҥа оскуола тутулларыттан баҕа санаабыт туолуо диэн үөрэбит эрэ», – диэтэ проректор.