Саха сиригэр, «Пушкин каартата» диэн федеральнай бырагыраамма чэрчитинэн култуурнай тэрээһиннэргэ буор-босхо сылдьар 186 билиэт атыыланна. Бу туһунан СӨ Култуураҕа уонна духуобунай сайдыыга министиэристибэтин пресс-сулууспата иһитиннэрэр.
«Саха сиригэр бу бырайыкка биэс култуура тэрилтэтэ киирдэ — Опера уонна Балет театра, А.С. Пушкин аатынан Нуучча драматическай театр, Судаарыстыбаннай филармония, «Россия-мин историям» историческай паарка, Национальнай художественнай музей. 186 билиэт атыыланна», — диэн иһитиннэриигэ этиллэр.
Билиэт сыаната: 300-1000 солк.
А.С. Пушкин аатынан Нуучча драматическай театрыгар «Пушкин каартатын» көмөтүнэн алтынньы саҥатыгар былааннаммыт «Капитанская дочка», «Барышня-крестьянка» испиктээкиллэри көрүөххэ сөп. Балаҕан ыйыгар көрөччүлэр каартанан «Сорванец», «Я буду ждать, даже если не придете», «Тетки», «Слишком женатый таксист», «Голодранцы и аристократы» испиктээкиллэри көрдүлэр.
Д.К. Сивцев — Суорун Омоллоон аатынан СӨ Опера уонна Балет театрыгар балаҕан ыйын 30 күнүгэр каартаҕа «Жизель» балет баар, ону тэҥэ Ульяновскай драматическай театрын испиктээкиллэрэ баар, кинилэр гастроллара Дьокуускайга балаҕан ыйын 23-26 күннэригэр ыытыллар. Ол курдук, балаҕан ыйын 23 күнүгэр — «Кадриль», балаҕан ыйын 24 күнүгэр — «Бедная Лиза», балаҕан ыйын 25 күнүгэр — «Любовный квадрат», балаҕан ыйын 25 күнүгэр — «Завещание».
Саха сирин Судаарыстыбаннай филармониятыгар каартанан кэнсиэр көрүөххэ сөп, оттон «Россия-мин историям» историческай пааркаҕа «Александр Невский. Судьба России», «Рюриковичи» уонна «Романовы» быыстапкаларыгар сылдьыахха сөп.