«Таптыыр кыыспыт кэргэн ылбытым, сөбүлүүр идэбинэн дуоһуйа үлэлээбитим, оҕолорум бүгүн көрөллөр-истэллэр, онон дьоллоох киһибин», — диир 90 сааһын туолбут Саха АССР үтүөлээх артыыһа, Саха сирин норуодунай артыыһа, сахаттан бастакынан Россия биллэр киинэлэригэр уһуллубут Спартак Федотов.
Спартак Петрович 1955 сыллаахха Шепкин аатынан театральнай училищены бүтэриэҕиттэн айар үлэтэ дохсун ат сүүрэринии саҕаламмыта. Ньурба театрыттан Саха драмтеатрын сыанатыгар тиийэ араас оруолга оонньообута. Ол быыһыгар салайар үлэҕэ да ситиһиилээхтик хардыылаабыта. Күн бүгүн Спартак Петрович үлэлээбит сылларын олус истиҥник ахтар.
Нуучча биллэр режиссердара киэҥ көҕүстээх, айылҕаттан талааннаах артыыһы тута бэлиэтии көрбүттэрэ. 1963 сылтан саҕалаан дойду биллэр киинэлэригэр устан саҕалаабыттара. Ол курдук, «Третья ракета», «Тайна предков», «Залив счастья» о.д.а киинэлэргэ Спартак Петрович оонньообута . Саамай бүтэһик оруолун 2010 сыллаахха «Саха снайпера»киинэҕэ толорбута.
Төһө да айар үлэ умсулҕаннаах суолунан айаннаатар, Спартак Петрович ыал аҕа баһылыга буоларын умнубатаҕа. Таптыыр кэргэнигэр, оҕолоругар өрүү болҕомто уурара.