Соторутааҕы Пуровскай оройуон Ямало-Ненецкэй автономнай уокуругар ыытыллыбыт бүтүн Россиятааҕы «Пуровское сияние» муус оҥоһук куонкуруһугар Роман Петров уонна Иван Румянцев иккис миэстэни ыллылар.
Тэрээһин «Новатэк» Россиятааҕы гаас хампаанньатын, Пуровскай оройуон дьаһалтатын өйөбүлүнэн, оройуон үбүлүөйдээх сылын көрсө бастакытын ыытылынна.
«Куонкуруска талар түһүмэх бастаан онлайн көрүҥүнэн буолбута. Онтон сүүмэрдээһини ааспыппыт кэннэ түмүктүүр түһүмэххэ ыҥырбыттара. Уопсайа аҕыс хамаанда Чувашияттан, Сочиттан, Пермь куораттартан уонна Пуровскай оройуонтан кытыннылар», — диэтэ муус оҥоһук маастара Роман Петров.
Роман оройуон дьоно-сэргэтэ кыттааччылара олус истиҥник көрсүбүттэрин, дьиэлэргэ олохтообуттарын туһунан кэпсээтэ. Күн-дьыл туруга күнүнэн уларыйа турар буолан үлэлииргэ саҥатын, интэриэһинэйин бэлиэтээтэ.
«Күн-дьыл туруга олус интэриэһинэй эбит. Холобур, бүгүн «+» кыраадыс, сарсыныгар 30 кыраадыс тымныы. Биһиги «Теплушка» диэн муус оҥоһугу чочуйан таһаардыбыт. Эдэр геолог күүстээх үлэ кэнниттэн кэлэн оһоҕун иннигэр иттэ, толкуйдуу олорорун, дьиэтин-уотун ис көстүүтүн оҥорон таһаардыбыт. Үлэбит олус табылынна диэн бэйэбит сыаналыыбыт», — диэтэ Роман.
Санатан эттэххэ, Нам улууһуттан төрүттээх Роман Петров уонна Иван Румянцев хаһыс да сылын муус, мас оҥоһуктар куонкурустарыгар Россия араас куораттарыгар кытталлар. Ол курдук, быйыл күһүн Тарко-Сале куоракка мас оҥоһук куонкуруһугар эмиэ ситиһиилэммиттэрэ.