Хас биирдии улууска дьон кутун туппут тэрээһиннэр баар буолаллар. Тохсунньу 14 күнүгэр Таатта народнай тыйаатырыгар 11-с төгүлүн «Две Звезды» ырыа күрэҕэ тэрээһиннээхтик буолан ааста.
Уопсайа аҕыс нэһилиэктэн 16 ырыаһыттар пааралара көрөөччү биһирэбилин ылла.
«Биһиги тэрээһиммит уратыта — дуэтынан ырыа күрэхтэһиитигэр кыайыылаахтары көрөөччүлэр быһаараллар. Тэрийээччи – улуустааҕы норуот айымньытын дьиэтэ улахан бириистэри туруорар. Ону таһынан, баҕа өттүнэн, спонсордар бириис биэрэллэр. Хас биирдии нүөмэрдэр чочуллаллар, сорох антуражтанар. Бары илэ ыллыыллар, “плюстаммыт” ырыа киирбэт», — диэтэ улуустааҕы норуот айымньытын дьиэтин салайааччыта Гаврил Вырдылин.
Түмүккэ Кылаан бириис хаһаайыннарынан Ытык Күөл олохтоохторо Айлин Филиппова, Тимур Смирников ааттаннылар.
«Күндү күрэспит кыттыылаахтарыгар дьолу-соргуну, чэлгийиини эрэ баҕарабыт, махтал тылларын аныыбыт», — диэн Гаврил кыттааччыларга баҕа санаатын эттэ.