Тохсунньу 29 күнүттэн Саха сирин көрөөччүлэрэ, «Окно в Европу-2020» бэстибээл сүрүн бирииһин ылбыт «Хара хаар» киинэни киин куорат киинэ тыйаатырдарыгар көрүөхтэрэ. Бу туһунан режиссер Степан Бурнашев иһитиннэрдэ.
«Тохсунньу 29 күнүгэр Дьокуускайга киинэ сүрэхтэниитэ буолуоҕа, оттон Россия атын куораттарыгар тохсунньу 28 күнүттэн көрдөрөн саҕалыахтара», — диэтэ кини.
Киинэ сүрэхтэниитэ дойду уон куоратыгар, ол иһигэр Москва, Санкт-Петербург уонна Пенза куораттарыгар, олунньу 4 күнүгэр сүрэхтэнэрин туһунан режиссер үллэһиннэ.
Киинэҕэ Саха сирин хотугу улуустарыгар табаар таһар Гоша диэн ааттаах дальнобойщик туһунан кэпсэнэр. Ол курдук, биир сырыытыгар арыгыны эккэ атастаһар. Соҕотох айанныырга быһаарынар, ол баран иһэн массыыната алдьанар. Суола уһун — кини соҕотох.
«Хара хаар» киинэ «Окно в Европу-2020» бэстибээл сүрүн бирииһин ылбыта, оттон Степан Бурнашев «Бастыҥ продюсер», Россия продюсердарын гильдиятын бирииһин хаһаайынынан буолбута.
Санатан эттэххэ, Esquire сурунаал «Хара хаар» киинэни 2020 сылга Россия бастыҥ киинэтинэн ааттаата.