Таатта Ытык Күөлүн олохтооҕо, модельер-дизайнер, норуот уус-уран оҥоһугун маастара Марианна Степанова 2016 сылтан «Оһуордаах Таатта» айар мастарыскыайын тэрийэн үлэлэтэр. Манна олох ханнык баҕар түгэнигэр: ыһыахха, дьоро киэһээлэргэ, күннээҕи үлэҕэ-үөрэххэ кэтиллэр аныгылыы моһуоннаах сахалыы халадаайдары тигэллэр. Былааччыйаларын таҥаһын ойуутун, оһуорун бэйэтэ уруһуйдаан, айан таһааран, Москва куоракка сублимационнай бэчээти оҥорон таһараар тэрилтэҕэ түһэттэрбит.
Марианна оҕо сылдьан ийэтэ иистэнэрин көрө улааппыт. Ол кэмтэн бэйэтэ эмиэ холонон көрүтэлээбит. Онтон Намҥа устудьуоннуур кэмнэригэр Светлана Петрова, Зинаида Понохова, Гаврил Петров курдук талааннаах уһуйааччыларга түбэспитин дьолунан ааҕар.
Бу курдук, Таатта биир талба талааннааҕа төрөөбүт дойдуга тапталынан сиэттэрэн, кини баай культуратыгар тирэҕирэн, итиэннэ дьиэ-кэргэнин, алтыһар чугас дьонун өйөбүлүнэн айар-тутар умсулҕаныгар сылдьар.
«Хас биирдии саха ыалын дьиэтигэр сахалыы туттар мал-сал, таҥас элбиирэ, ыраас сахалыы саҥа иһиллэрэ буоллар» – диэн ыра санаатын үллэстэр.