Афанасий Осипов 96 сааһын көрсө Дьокуускайга Афанасий Осипов аатынан хартыына галереятыгар «Төрөөбүт дойдутуттан иэйии ылан» кинигэ сүрэхтэниитэ буолла.
Ыҥырыылаах ыалдьыттар саҥа сүрэхтэммит кинигэни тутан, кинигэ дириҥ суолтатын, Афанасий Николаевич олоҕо кэнэҕэски ыччакка чаҕылхай холобур буоларын бэлиэтээтилэр.
Маннык суолталаах кинигэни РФ суруналыыстарын сойууһун чилиэнэ, биллиилээх суруналыыс Василий Ильич Алексеев хомуйан, бэлэмнээн таһаарда.
Саҥа кинигэҕэ ССРС, РСФСР, Саха АССР норуодунай худуоһунньуга Афанасий Николаевич Осипов суруналыыс Василий Ильич Алексеевы кытта араас сылларга кэпсэтиитэ, мунньахтарга, элбэх үөрүүлээх тэрээһиннэргэ тыл этиилэрэ түмүллэн киирдилэр.
Ону тэҥэ бу күн галерея саалатыгар Афанасий Николаевич дойдутун дьонун, айылҕатын кытта алтыһыытын үйэтиппит хаартысканан быыстапка арылынна.