«Россия — мин историям» историческай пааркаҕа Саха АССР төрүттэммитэ 100 сылыгар аналлаах «Саха сирин аныгы историята» мультимедийнэй быыстапка үөрүүлээх арыллыыта буолла. Бу туһунан ЯСИА иһитиннэрэр.
Быыстапка арыллыытыгар СӨ бырабыыталыстыбатын бэрэссэдээтэлин солбуйааччы Сергей Местников кыттыыны ылла. Дьокуускайга «Россия — мин историям» историческай паарка тэриллиэҕиттэн аныгы технологияны туһанан Саха АССР төрүттэммитэ 100 сылынан быыстапка тэрийии туһунан санаа баарын, үөрүүлээх тэрээһин быйыл буолбута ураты суолталааҕын бэлиэтээтэ.
«Бүгүн Саха сирин өрөспүүбүлүкэтин төрүттэниитин историятын кэпсиир, бу туһугар турууласпыт дьону сырдатар наадалаах. Биһиги историябытын кэлэр көлүөнэҕэ тиэрдиэхтээхпит. Быыстапканы элбэх оҕо уонна үөрэнээччи уруокка үөрэтэрин таһынан мультимедийнэй технологиялар көмөлөрүнэн эмиэ көрүө диэн эрэнэбин», — диэн кини чопчулаан эттэ.
Быыстапканы тэрийиигэ 2300-тэн тахса хаартысканы, архыып докумуоннарын уонна түмэл пуондатын, Саха сирин национальнай архыыбын, И.С. Жараев аатыттан Саха сирин норуоттарын аудиоивзуальнай нэһилиэстибэтин национальнай киинин видеоматырыйаалларын туһаннылар. Матырыйаал баһыйар үгүс өттүн киэҥ эйгэҕэ бастакытын таһаардылар.
«Саха сирин аныгы историята» быыстапканы муус устар 22 күнүттэн сыл бүтүөр диэри көрүөххэ сөп.
