Дьокуускай куорат «Лена» киинэ тыйаатырыгар бэҕэһээ, олунньу 21 күнүгэр, кэтэһиилээх «Хапсыһыы» киинэ пресс-кердеруутэ буолла. Киинэҕэ сахалартан бастакы оҕолорго көҥүл тустууга Сойуус чемпиона буолбут Вячеслав Карпов олоҕо ойууланар.
Бу киинэни 2022 сылтан Уус Алдан улууһугар устубуттара. Киинэ кылаабынай оруолун туруорааччы режиссер Эр Санаа Ох-Хотор бэйэтинэн оонньуур. Кини бу номнуо үһүс киинэтэ буолар. Вячеслав Карпов дьиҥ олоҕун үөрэтэн, хасыһан, сорох матырыйаалларын кэргэниттэн туоһулаһан, киинэ толору ситэн-хотон таҕыста. Сойуус чемпиона Вячеслав Карпов баара буоллар быйыл 77 сааьын бэлиэтиэ этэ.
Вячеслав Карпов киэҥник биллэригэр улахан кылааты киллэрбит, улуу тренер Дмитрий Коркин буолар. Ону тэҥэ кини уһуйбут оҕолоро Роман Дмитриев, Павел Пинигин, Александр Иванов курдук чулуу тустууктар Саха сириттэн олимп чыпчаалыгар тиийэн, кыайыы үктэллээх кэлбиттэрэ. Балартан Вячеслав биир чугас истиҥ доҕоро Александр Иванов бу үөрүүлээх тэрээһиҥҥэ ыалдьыт быһыытынан кэлэн санаатын үллэстэр.
Вячеслав Павлович кэлин тустуутун тохтотон дуобат эйгэтигэр көспүтэ. Онно утумнаахтык дьарыктаммытын түмүгэр маастарга хандьыдаат нуорматын толорбута. Кини дуобакка уһуйбут дьонуттан сахалартан бастакынан Россия гроссмейстера буолбут, киэн туттар киһибит Александр Азаров буолар.
Норуот бүттуун күүппүт «Хапсыһыы» киинэтэ олунньу 22 күнүгэр Саха сирин бары киинэ тыйаатырдарыгар тахсаары турар. Чахчы даҕаны хас биирдии киһини дириҥник толкуйдатар, өйү-санааны уларытар киинэ дьон-сэргэ сөбүлэҥин ылыаҕа.