Хаҥалас улууһугар «Россия-Культура» ханаал үлэһиттэрэ Покровскайга олорор Бабатунде дьиэ кэргэни устубуттар. Кинилэр бүгүн Өлүөнэ очуостарыгар уонна бизонарийга сылдьаллар. Бу туһунан улуус дьаһалтатын пресс-сулууспата иһитиннэрэр.
Нигериец Марк Бабатунде саха кыыһын Наталья Иванованы кэргэн ылан Покровскайга олорор. Кинилэр 2004 сыллаахха Дацин диэн Кытай куоратыгар устудьуоннуу сылдьан билсибиттэр. Иккиэн кытай тылын үөрэппиттэр. Аны уон сылынан кэргэнниилэр оҕолорун илдьэ Наталья дойдутугар көһөн кэлбиттэр. Марк буоллаҕына оскуолаҕа аангылыйа уонна кытай омук тылларын учууталынан ананан үлэлии киирбит. Кини киэҥ билиилээх, нууччалыы олус үчүгэйдик саҥарар эбит.
Бу устубут биэриилэрэ эфиргэ хаһан тахсара чуолкайдана илик.