Тохсунньу 22 күнүттэн 31 күнүгэр диэри Национальнай библиотекаҕа Саха сирин норуоттарын тылларынан бэчээттэммит бастакы кинигэлэр быыстапката ыытыллар.
Быыстапкаҕа дэҥҥэ көстөр кинигэлэри көрүөххэ сөп. Бу кинигэлэр Национальнай библиотекаҕа научнай чинчийэр кииҥҥэ пааматынньык быһыытынан харыстаналлар. Ол иһин кинигэлэр оннуларыгар QR-даах кумааҕылар көрүнньүккэ тураллар.
Саха тылынан тахсыбыт бастакы кинигэ Саха сирин нэһилиэнньэтин христианскай итэҕэлгэ тардыыны, маассабай христианскай миэрэҕэ киллэриини кытта ыкса сибээстээх. Таҥара кинигэтин тылбаастааһын нэһилиэнньэни үөрэхтээһиҥҥэ үтэйэр күүс буолбута. Онон маннык кинигэ култуурунай уонна историческэй сыаннастаах буолар.
1812 сыллаахха Иркутскайга «Молитвы. Символ Веры и Заповеди Божьи (Начатки вероучения)» диэн кинигэ саха уонна чукча тылларынан тылбаастанан күн сирин көрбүтэ. Чинчийээччилэр бу кинигэни өссө да була иликтэр. Кинигэ туһунан «Ведомости о миссионерских изданиях для просвещения инородцев Якутской области» диэн кинигэттэн ылбыттара.
«Ведомостины» 1904 сыллаахха Саха сирин епискоба Никанор суруйбута. Бу кинигэ Саха сирин олохтоох норуоттарын тылынан тахсыбыт аан бастакы кинигэ быһыытынан биллэр.