Бүгүн, сэтинньи 18 күнүгэр, саҥа дьыл сүрүн бэлиэтэ Тымныы оҕонньор төрөөбүт күнүн бэлиэтиир. Бу туһунан Россиятааҕы иһитиннэрэр ааҕыныстыба тириэрдэр.
Кини төрөөбүт күнүн оҕолор көҕүлээһиннэринэн, 2005 сыллаахтан Улуу Устюг куоракка бэлиэтиир буолбуттара. Бу күнтэн Вологодскай уобаласка дьиҥнээх кыһын кэлэр.
Тымныы оҕонньор төрөөбүт күнүгэр араас дойдулартан уонна Россия куораттарыттан остуоруйа дьоруойдара кэлэллэр. Бу сыллар устата киниэхэ Саха сириттэн Чысхаан, Салехардтан Ямал Ири, Целле куораттан (Германия) Вайнахтсман, Словакияттан Микулаш уонна да атыттар ыалдьыттаатылар.
Бу күн Улуу Устюг сүрүн болуоссатыгар Тымныы оҕонньор дойдуга бастакы харыйа уотун уматар. Бырааһынньык кэнниттэн кини дойду куораттарынан саҥа дьыллааҕы айаҥҥа турунар.