Хаҥалас улууһун Төхтүр сэлиэнньэтигэр саҥа культурнай-спортивнай комплекс үлэҕэ киирдэ.
Сэлиэнньэ эргэ култуура дьиэтэ аварийнай туруктаах буолан үлэлээбэккэ турбут. Маны тэҥэ спортзал суох буолан бары күрэхтэһии оскуолаҕа ыытыллара.
Саҥа комплекс тыһыынча квадратнай миэтэрэ иэннээх, икки этээстээх тутуу буолар.
«2017 сыллаахха биһиги «Сахам сирэ XXI үйэҕэ» бүтүн өрөспүүбүлүкэтээҕи үтүө дьыала бырагыраамаҕа киирэн икки сыл иһигэр культурнай-спортивнай комплекс тутуллан үлэҕэ киирдэ. Комплекс тутуутугар уопсайа 27 мөлүйүөн солкуобай көрүлүннэ», — диэн Төхтүр нэһилиэгин баһылыга Кэскил Иванов эттэ.
Культурнай-спортивнай комплекска Төхтүртэн төрүттээх СӨ сибээһин уонна информационнай технологиятын урукку миниистирин Александр Борисов аата иҥэрилиннэ.