Өрөспүүбүлүкэтээҕи култуурунай нэһилиэстибэни харыстыыр департамена өрөспүүбүлүкэ улуустарыгар сыллата ыытыллар история уонна култуура пааматынньыктарыгар экспедиция үлэтин саҕалыыр. Бу туһунан департамент пресс-сулууспата иһитиннэрэр.
Эбийиэктэри көрүү пааматынньыктар туруктарын чопчулуур мониторинг ыытыахтара уонна култуура нэһилиэстибэтин эбийиэктэрин харыстааһын сокуонугар кэһии чахчыларын бэлиэтиир сыаллаах.
Ол курдук, быйыл Миирнэй, Лэнскэй, Сунтаар, Ньурба, Үөһээ Бүлүү уонна Бүлүү пааматынньыктарын көрүөхтэрэ.
Археологияҕа самаай элбэх ахсааннаах эбийиэктэрдээх — Сунтаар уонна Бүлүү улуустарыгар сэттэлии пааматынньыгы чинчийэр былааннаахтар.
«Өлүөхүмэ уонна Аллараа Халыма улуустарыгар пааматынньыктары харыстааһын туһунан сокуону кэһии туһунан иһитиннэриилэри бэрэбиэркэлиэхтэрэ», — иһитиннэриигэ этиллэр.
Ону таһынан, өрөспүүбүлүкэтээҕи култуурунай нэһилиэстибэни харыстыыр департамена уонна История уонна култуура пааматынньыктарын харыстыыр Бүтүн Россиятааҕы уопсастыба Саха сиринээҕи салаата тэҥҥэ Мэҥэ Хаҥалас улууһугар историческай уонна култуурунай сыаннастаах саҥа эбийиэктэри булан бэлиэтииргэ ананар экспедицияны ыытыахтара.
Бу сырыы «Манчаары башнята, XIX үйэ» федеральнай суолталаах пааматынньыгы саҥардыы уонна Мэҥэ Богородскай таҥара дьиэтин чөлүгэр түһэрии боппуруоһун кытта сибээстээх диэн бэлиэтэнэр.
Уус Алдан улууһугар мониторинг ыытыллара былааннанар. Ол кэннэ Дүпсүн нэһилиэгэр уһулуччулаах дьон олохторун кытта сибээстээх сорох эбийиэктэри, ол иһигэр В.В. Никифоров-Күлүмнүүр дьиэтин, харыстааһыҥҥа ылыы туһунан быһаарыы ылыллыаҕа.
2020 сылга өрөспүүбүлүкэтээҕи култуурунай нэһилиэстибэни харыстыыр Департамен үлэһиттэрэ Өлүөхүмэ, Чурапчы, Таатта, Хаҥалас, Уус Алдан уонна Миирнэй улуустарыгар сылдьыбыттар. Онно кинилэр 40 пааматынньыгы көрбүттэр уонна археология сорох эбийиэктэрин булуу миэстэлэрэ чуолкайдаабыттар.